മമ്മൂട്ടിയുടെ നക്ഷത്രമായി വിദ്യ ബാലന്‍?

 

പേരില്‍ തന്നെ കൗതുകമുണര്‍ത്തിയ അരിവാള്‍ ചുറ്റിക നക്ഷത്രത്തിലെ നായികയ്ക്കായുള്ള അന്വേഷണത്തിലാണ് സംവിധായകന്‍ അമല്‍ നീരദ്. മമ്മൂട്ടിയും പൃഥ്വിയും നായകനും വില്ലനുമായെത്തുന്ന ചിത്രത്തിലേക്ക് മലയാളത്തിന് പുറത്തുനിന്നുള്ള താരങ്ങളുടെ പേരാണ് പറഞ്ഞുകേള്‍ക്കുന്നത്. ഇതില്‍ തന്നെ ബോളിവുഡ് താരവും പാതി മലയാളിയുമായ വിദ്യ ബാലനാണ് കൂടുതല്‍ സാധ്യത കല്‍പ്പിയ്ക്കപ്പെടുന്നത്.

മമ്മൂട്ടിയും പൃഥ്വിരാജും മലയാളത്തില്‍ മാത്രം ഒതുങ്ങി നില്‍ക്കുന്നവരല്ലെന്നും മോളിവുഡിന് പുറത്തും ഇവര്‍ക്ക് താരമൂല്യമുണ്ടെന്നും അമല്‍ നീരദ് പറയുന്നു. അതുകൊണ്ട് തന്നെ ഇരുവര്‍ക്കും യോജിക്കുന്ന ഒരു നായികയെ മലയാളത്തിന് പുറത്തുനിന്ന് അന്വേഷിയ്ക്കുന്നതെന്നും അദ്ദേഹം സൂചിപ്പിച്ചു. മോളിവുഡിന് പുറത്തും സിനിമയ്ക്ക് ബിസിനസ് കണ്ടെത്താനാണ് ഈ കാസ്റ്റിങിലൂടെ അമല്‍ നീരദ് ശ്രമിയ്ക്കുന്നത്.

സിനിമയുടെ പേര് രാഷ്ട്രീയപാര്‍ട്ടിയുടെ ചിഹ്നമാണെങ്കിലും ഇതൊരു രാഷ്ട്രീയ സിനിമയല്ലെന്നാണ് റിപ്പോര്‍ട്ടുകള്‍. അരിവാള്‍ ചുറ്റിക നക്ഷത്രം എന്നതു കൊണ്ട് നായകന്‍, വില്ലന്‍, നായിക എന്നിവരെയാണ് സൂചിപ്പിക്കുന്നത്. 1940-50 കാലഘട്ടമാണ് അമല്‍ നീരദ് ചിത്രത്തിന്റെ പശ്ചാത്തലം.